ប្រែសម្រួល៖ ស-សម្បត្តិ

យន្តហោះរបស់ក្រុមហ៊ុន Delta Air Lines បានធ្លាក់ពេលចុះចត និងត្រឡប់ចុះក្រោមនៅលើផ្លូវរត់នៃអាកាសយានដ្ឋានអន្តរជាតិ Toronto Pearson កាលពីថ្ងៃចន្ទ ហើយដោយអព្ភូតហេតុ អ្នកដំណើរទាំងអស់នៅលើយន្តហោះបានរួចផុតពីគ្រោះថ្នាក់ដោយគ្មានរបួសធ្ងន់ធ្ងរ នេះបើតាមការអះអាងពីមន្ត្រី។

មនុស្ស១៨នាក់បានរងរបួស ប៉ុន្តែគ្មាននរណាម្នាក់ត្រូវបានគេជឿថាមានរបួសធ្ងន់ធ្ងរនោះទេ នៅពេលជើងហោះហើរ Delta លេខ៤៨១៩ បានធ្លាក់ពេលចុះចតនៅលើផ្លូវរត់ដែលមានព្រិលក្នុងទីក្រុងធំបំផុតរបស់ប្រទេសកាណាដា នេះបើយោងតាមប្រសាសន៍របស់លោក Todd Aitken ប្រធានពន្លត់អគ្គិភ័យនៃអាកាសយានដ្ឋាន Pearson ក្នុងសន្និសីទសារព័ត៌មានមួយនាល្ងាចថ្ងៃចន្ទ។

ក្រុមសង្គ្រោះបឋមបានរាយការណ៍ពីមុនថា មនុស្សបីនាក់ស្ថិតក្នុងស្ថានភាពធ្ងន់ធ្ងរ រួមទាំងកុមារម្នាក់ មុនពេលលោក Aitken ចេញផ្សាយព័ត៌មានថ្មី។

អ្នកដំណើរទាំង៨០នាក់បានចេញពីយន្តហោះមុនពេលវាឆេះ។

ជើងហោះហើរនេះ ដែលដំណើរការដោយក្រុមហ៊ុនបុត្រសម្ព័ន្ធ Endeavor Air បានហោះចេញពីទីក្រុង Minneapolis ប្រហែលម៉ោង១១:៤៧ព្រឹក និងបានធ្លាក់នៅប្រហែលម៉ោង២:១៥រសៀល។

មិនទាន់មានភាពច្បាស់លាស់ពីមូលហេតុដែលធ្វើឱ្យយន្តហោះត្រឡប់ចុះក្រោមនោះទេ ប៉ុន្តែលោក Aitken បានកត់សម្គាល់ថា “ផ្លូវរត់ស្ងួត ហើយគ្មានខ្យល់បក់ខ្លាំងទេ។” យន្តហោះដែលខូចខាតត្រូវបានទុកចោលដោយមានផ្សែងនៅលើផ្លូវរត់មានព្រិល ខណៈអ្នកដំណើរដែលមានស្ថានភាពវិលមុខប្រញាប់រត់ចេញ។

យន្តហោះប្រភេទ Bombardier CRJ-900LR មានស្លាបមួយខូចខាតធ្ងន់ធ្ងរ និងផ្នែកកន្ទុយត្រូវបានកាត់ដាច់ខ្លះ។

វីដេអូគួរឱ្យរន្ធត់នៃគ្រោះថ្នាក់ដែលបានបង្ហោះដោយ Storyful បង្ហាញពីអ្នកពន្លត់អគ្គិភ័យពីរនាក់លោតចេញពីទ្វារចំហៀងយន្តហោះ និងរត់ទៅកាន់កន្លែងសុវត្ថិភាពតែប៉ុន្មានវិនាទីមុនពេលមានការផ្ទុះអណ្តាតភ្លើងយ៉ាងធំពីតួយន្តហោះ។

ក្រុមសង្គ្រោះបឋមបានប្រាប់ BBC ថាពួកគេបានដឹកជញ្ជូនអ្នករងរបួសធ្ងន់ធ្ងរបីនាក់ទៅមន្ទីរពេទ្យផ្សេងៗគ្នាបីកន្លែង រួមមាន “អ្នកជំងឺកុមារ” បុរសម្នាក់អាយុជាង៦០ឆ្នាំ និងស្ត្រីម្នាក់អាយុជាង៤០ឆ្នាំ។

អាយុរបស់កុមាររងរបួសមិនទាន់ច្បាស់លាស់នៅឡើយទេ ហើយអត្តសញ្ញាណរបស់អ្នករងរបួសផ្សេងទៀតមិនត្រូវបានបង្ហាញឡើយ។

បុគ្គលិកអាកាសយានដ្ឋានបានប្រាប់ CTV News ថា អាកាសយានដ្ឋានបានបិទការហោះចុះចត និងចេញដំណើរទាំងអស់ក្រោយគ្រោះថ្នាក់នេះ។

វីដេអូគួរឱ្យរន្ធត់ដែលបានបង្ហោះនៅលើ Facebook ដោយអ្នកដំណើរម្នាក់បង្ហាញពីអ្នកពន្លត់អគ្គិភ័យ អ្នកសង្គ្រោះបឋម និងបុគ្គលិកសង្គ្រោះបន្ទាន់ផ្សេងទៀតកំពុងប្រញាប់ប្រញាល់ឆ្លងកាត់ផ្លូវរត់ដែលមានព្រិលទៅកាន់យន្តហោះដែលត្រឡប់ចុះក្រោម។

អ្នកដំណើរ Ashley Zook បានបង្ហោះវីដេអូជាច្រើនដែលថតយកភាពចលាចលនៅលើ Snapchat របស់នាង រួមទាំងវីដេអូមួយដែលនាងព្យួរក្រោមដោយនៅតែចងខ្សែក្រវ៉ាត់អង្គុយភ្លាមៗក្រោយគ្រោះថ្នាក់។

“ខ្ញុំទើបតែជួបគ្រោះថ្នាក់យន្តហោះ។ អូ ព្រះអើយ!” Zook បានឧទានដោយភ័យព្រឺខណៈពេលនាងងាកមើលយន្តហោះដែលខូចខាតយ៉ាងដំណំ។

អ្នកដំណើរផ្សេងទៀតបានថតអ្វីដែលពួកគេអាចថតបានក្រោយពេលចុះពីយន្តហោះ ខណៈពេលដើរញ័រៗចេញពីកន្លែងគ្រោះថ្នាក់។

“យើងនៅទីក្រុង Toronto។ យើងទើបតែចុះចត។ យន្តហោះរបស់យើងបានធ្លាក់ វាត្រឡប់ចុះក្រោម។ ក្រុមពន្លត់អគ្គិភ័យកំពុងនៅទីនេះ។ វាត្រឡប់ចុះក្រោម។ មនុស្សភាគច្រើនហាក់ដូចជាមិនអីទេ។ យើងទាំងអស់គ្នាកំពុងចាកចេញ។ នេះហើយជាអ្វីដែលកំពុងកើតឡើង” នេះបើតាមការនិយាយរបស់អ្នកដំណើរ John Nelson ក្នុងវីដេអូដែលគាត់បានបង្ហោះនៅលើ Facebook ភ្លាមៗក្រោយគ្រោះថ្នាក់។

មនុស្សម្នាក់ទៀតបានប្រញាប់សរសើរការជួយអន្តរាគមន៍ពីព្រះអង្គសម្រាប់ការសង្គ្រោះជីវិតទាំង៨០នាក់នៅលើយន្តហោះ។

“យើងជឿលើព្រះអង្គសម្រាប់ការជាសះស្បើយទាំងស្រុង។ យើងមិនដែលឮពីយន្តហោះធ្លាក់ត្រឡប់ចុះក្រោមទេ ប៉ុន្តែខ្ញុំសូមអរគុណទ្រង់សម្រាប់អំណាចដែលបានការពារការកើតទុក្ខបន្ថែមក្នុងគ្រួសារអាកាសចរណ៍របស់យើងនៅសប្តាហ៍នេះ។ សូមបន្តអធិស្ឋានសម្រាប់ខ្ញុំដែលត្រូវហោះហើររយៈពេល៩ថ្ងៃជាប់ៗគ្នា” នេះជាអ្វីដែល Ian Crowder បានសរសេរនៅលើ Facebook។

នាយនគរបាល Sarah Patten នៃនគរបាលតំបន់ Peel នៅរដ្ឋ Ontario បានប្រាប់ Reuters ថា “តាមការយល់ដឹងរបស់ខ្ញុំ អ្នកដំណើរភាគច្រើនបានចេញមកក្រៅដោយសុវត្ថិភាព ប៉ុន្តែយើងនៅតែព្យាយាមធ្វើឱ្យប្រាកដ ដូច្នេះយើងនៅតែបន្តស៊ើបអង្កេតនៅទីកន្លែងកើតហេតុ។”

សហជីពអ្នកបម្រើលើយន្តហោះបានបញ្ជាក់របាយការណ៍នៅលើបណ្តាញ X ថា “គ្មានអ្នកស្លាប់” ក្នុងហេតុការណ៍នេះ។

យន្តហោះនេះជាប្រភេទ Bombardier CRJ-900LR ដែលអាចដឹកអ្នកដំណើរបានរហូតដល់៨៨នាក់ និងបុគ្គលិកបម្រើការបួននាក់ យោងតាមកំណត់ត្រាហោះហើរ។

គ្រោះថ្នាក់នេះកើតឡើងក្រោយព្យុះរដូវរងារនៅចុងសប្តាហ៍ក្នុងតំបន់ដែលបានធ្លាក់ព្រិលជិត៩អ៊ីញនៅអាកាសយានដ្ឋាន ធ្វើឱ្យក្រុមការងារត្រូវធ្វើការពេញមួយយប់ថ្ងៃអាទិត្យដើម្បីសម្អាតផ្លូវរត់សំខាន់ៗ។

វាជាគ្រោះថ្នាក់ធំដំបូងគេដែលពាក់ព័ន្ធនឹងយន្តហោះដឹកអ្នកដំណើរពាណិជ្ជកម្មចាប់តាំងពីគ្រោះថ្នាក់នៃឧទ្ធម្ភាគចក្រ Black Hawk របស់កងទ័ព និងជើងហោះហើរ American Airlines លេខ៥៣៤២ នៅអាកាសយានដ្ឋានជាតិ Ronald Reagan កាលពីថ្ងៃទី២៩ ខែមករា ដែលបណ្តាលឱ្យស្លាប់អ្នកដំណើរ និងបុគ្គលិក៦៧នាក់។

ក្រុមហ៊ុន Delta Air Lines មិនទាន់បានឆ្លើយតបនឹងសំណើសុំការអត្ថាធិប្បាយពីសារព័ត៌មានThe Post នៅឡើយទេ៕